20/12/16

"ESPECIES DE ESPAZOS"

     O 13 de decembro @s alumn@s de 5º e 6º recibimos unha bonita lección de:
  • Iniciativa e espírito emprendedor.
  • Traballo colaborativo.
  • Expresión artística.
  • Fotografía.
  • Arquitectura.
  • Aproveitamento dos recursos naturais, materiais e persoais.
  • Respecto ao medio ambiente.
  • Reducir, Reciclar, Reutilizar.
  • Responsabilidade para a conservación e mellora do noso patrimonio natural, histórico e cultural.
     Acompañad@s polas mestras Susana, Pilar e Claudia achegámonos ata o Centro Cívico, situado no edificio do antigo Concello.

    Alí agardábanos Sheila García Prado para nos presentar o proxecto "ESPECIES DE ESPAZOS" centrado na recuperación da antiga escola de Agudelo que ardeu hai moitos anos e está situada xunto a igrexa.


     Sheila explicounos que lle chamaban "A escola da cruz pequena" porque na contorna había moitas cruces pero a máis pequena de todas era a que estaba xusto ao lado da escola.

   Das paredes da sala do Centro Cívico penduraban unha chea de fotografías nas que puidemos observar detidamente o antes e o despois, logo do "lavado de cara" e adecentamento que fixeron Sheila e o equipo de persoas que traballaron arreo nunha fin de semana. Vaia cambio ! 


    Chamounos moitísimo a atención a transformación que sufriron as paredes da escola que, en apenas dous días, pasaron de estar ennegrecidas polo incendio a ofrecer un aspecto espectacular coas cores das estacións do ano: o branco do inverno, os verdes da primavera, os marróns e vermellos do outono, e os amarelos e laranxas do verán.

     Logo atendemos con moito interese a un vídeo que puxo Sheila sobre o traballo desenvolvido. Nel aparecían unhas palabras clave cheas de significado:
  • "Transforma": Reutilización e reciclaxe de materiais de refugallo (pneumáticos, palés, taboleiros . . . ) para facer mesas, bancos, maceteiros . . . 
  • "Máis verde": Plantación de especies autóctonas (como castiñeiros) nos arredores da antiga escola para crear un agradable espazo de encontro entre a veciñanza.
  • "As cores do rural": Simbolizadas no mural da parede con triángulos multicolores.
  • "Metendo a man na terra": Sobre o desenvolvemento do medio rural.

     Sheila contestou, logo, a todas as nosas preguntas. Así soubemos, por exemplo, que os cartos necesarios para levar a cabo o proxecto conseguíronos grazas á participación no programa "Iniciativa Xove" da Xunta de Galicia. Iso si que é darlle un bo uso ao diñeiro: Transformar un espazo feo e inútil nun espazo bonito e cheo de vida e posibilidades onde a xente poida reunirse e gozar con moitas actividades.

     Sheila é arquitecta e coñece a un montón de arquitect@s comprometid@s cos 3 erres (Reducir, Reutilizar, Reciclar) e tiña preparada unha presentación audiovisual para que nós os coñeceramos:
  • CURRO CLARET: Deseñador industrial catalán que reutiliza, por exemplo, madeira para facer taburetes, estantes . . . 
  • PATRICIA URQUIOLA: Arquitecta e deseñadora española que deseña cadeiras e outros obxectos con cartón e madeira laminada.
  • K-LO TALLER DE ECODESEÑO: Estudio no que traballan distintos profesionais comprometidos co deseño sostible. Destacan as súas lámpadas de cartón ás que lles aplican un tratamento especial de acabado.
  • BASURAMA: Colectivo cultural que, como a súa palabra indica, utiliza desperdicios e produtos de refugallo para facer as súas obras.
  • SHIGERU BAN: Arquitecto xaponés que fai casas a partir de tubos de cartón cun tratamento especial que os fai resistentes á auga e ás variacións de temperatura, de xeito que poden aguantar ata dez anos. Incrible pero certo !
  • MICHAEL REYNOLDS: Deseña e constrúe casas con materiais naturais e reciclados.
     Quedamos marabillad@s ! ! !

     Ao despedirmos, Sheila aínda tivo o detalle de nos agasallar a tod@s e cada un de nós cunha foto  relacionada co proxecto.

     De volta nas aulas, unha chea de ideas rebulían nas nosas cabeciñas.

     Canto aprendemos e que ben o pasamos !


 MOITÍSIMAS GRAZAS ! ! ! 

   
Máis información no blog da nosa Biblioteca :



Ningún comentario:

Publicar un comentario

VISITAS