O alumnado de 6º asistiu a varias sesións ao Programa de Prevención de Condutas Aditivas que se imparten de forma conxunta nos Concellos de Barro, Cuntis, Campo Lameiro. Moraña e Portas.
Nela recordamos conceptos como autoestima e autocepto, pero tamén aprendemos a previr condutas de risco relacionadas co consumo de tabaco e substancias daniñas, así como do uso das TRIC.
.jpg)
Co obxectivo triple de coñecer a nosa contorna, coidar do medio ambiente e practicar sendeirismo, o alumnado de 6º de Primaria desenvolveu, ao longo do curso, diversas tarefas relacionadas coa regra dos 3R, participou nas Patrullas Verdes, realizou traballos de investigación e de campo para recoller datos sobre diversos aspectos culturais e científicos da contorna, e percorreron un pequeno tramo do Camiño de Santiago, con recollida de refugallos incluída.
Moitísimos Parabéns!!!
O alumnado de 6º de Primaria asistiu hoxe a unha charla informativa sobre o apaixonante mundo da apicultura, celebrada no Salón de Actos do Concello de Barro.
O acto comezou cunha cálida benvida do alcalde, Xosé Manuel Fernández Abraldes, que presentou ao alumnado a campaña divulgativa que está a desenvolver o Concello en colaboración coa Asociación de Apicultores de Barro. O obxectivo da campaña é dobre: por un lado, sensibilizar sobre a importancia das abellas para os ecosistemas a través da polinización e, por outro, concienciar contra os efectos prexudiciais da vespa velutina, que tanto dano fai á biodiversidade.
O noso ex alumno, Esteban Jamardo, que estivo acompañado por Manolo Outón, integrantes ambos da Asociación, levou ao noso alumnado a gozar dunha viaxe fantástica polo mundo das abellas.
Dun xeito ben ameno e didáctico, explicou o funcionamento dunha colmea, a incrible organización das abellas, a súa linguaxe secreta, a función da raíña e das obreiras, o sorprendente sistema de orientación e comunicación destes insectos sociais, a recolección do pole e do néctar, a produción do mel e da cera, os equipos de protección para apicultura, e moitas curiosidades máis que as mozas e mozos seguiron con moito interese e atención.
Logo de responder a todas as inquedanzas e preguntas do alumnado, Esteban meteuse de cheo na exposición dos perigos e ameazas que entrañan as vespas velutinas e como e cando facer o trampeo máis eficaz das raíñas para mitigar o problema. Provisto do material preciso, o noso ponente demostrou maneiras rápidas de facer trampas, que as mozas e mozos aprenderon rápìdo, co compromiso de poñelas en espazos estratéxicos do patio escolar, así como nas súas hortas e xardíns.
Un encontro fascinante!!!
Moitísimas grazas!!!
O alumnado de 6º participou nun interesante programa de Entrenamento en Habilidades Sociais e nun obradoiro de Prevención dos riscos e mitos do alcol e tabaco, promovidos polo Concello e impartidos pola psicóloga Julia Búa.
Esperamos que esta información recibida lles sirva para tomar conciencia das consecuencias que estas drogas poden causar nas súas vidas.
A primeira saída deste curso foi unha camiñada, inicialmente prevista para ir dende O Pontillón, en Berducido, ata Barosa, en Barro. Comezámola o venres 28 de setembro, un día anubrado e con néboa no que o alumnado de 5º e 6º de Primaria comezamos o percorrido acompañado por titoras e mestras; e guiado polo noso alcalde, Xosé Manuel Fernández Abraldes, bo camiñante e coñecedor das rutas do Concello.
Axiña chegamos a Barosa, onde paramos a merendar e a xogar nunha zona recreativa ben bonita aínda que moi fresca e sombría porque queda nun val arrodeado dun gran arboredo. 
